Phile | NdeIBE

Philemon

1 UPhawuli, isibotshwa sikaKhristu uJesu, loThimothi umzalwane wethu, KuFilimoni umngane wethu othandekayo loyisisebenzi kanye lathi, 2 ku-Afiya udadewethu, ku-Akhiphu olibutho kanye lathi, lasebandleni elihlanganela ekhaya lakho:

3 Umusa kawube kuwe kanye lokuthula okuvela kuNkulunkulu uBaba laseNkosini uJesu Khristu.

Ukubonga lokukhuleka

4 Ngihlezi ngimbonga kokuphela uNkulunkulu wami lapho ngikukhumbula emikhulekweni yami, 5 ngoba ngiyezwa mayelana lothando lwakho lokukholwa eNkosini uJesu kanye lothando lwakho kubo bonke abangcwele. 6 Ngiyakhuleka ukuba ukhuthale ekwabeni ukukholwa kwakho ukuze ube lokuqedisisa okupheleleyo ngezinto zonke ezinhle esilazo kuKhristu. 7 Uthando lwakho lungiphe ukuthokoza okukhulu lokududuzeka, ngoba wena, mzalwane, uvuselele izinhliziyo zabangcwele.

Isikhalazo sikaPhawuli ngo-Onesimu

8 Ngakho, lanxa kuKhristu ngingaba lesibindi ngikulaye ukuba wenze lokho okumele ukwenze, 9 kodwa ngiyakuncenga ngenxa yothando. Ngakho-ke mina, enginguPhawuli – umuntu omdala khathesi oyisibotshwa sikaKhristu uJesu futhi – 10 ngiyakuncenga ngenxa yendodana yami u-Onesimu owaba yindodana yami ngibotshiwe. 11 Kuqala wayengelasizo kuwe, kodwa khathesi uselusizo kuwe lakimi.

12 Ngiyamthuma – yena oyinhliziyo yami uqobo – emuva kuwe. 13 Kade ngingathanda ukumgcina elami ukuze athathe indawo yakho yokungisiza ngisabotshelwe ivangeli. 14 Kodwa angithandanga ukwenza lutho kungelamvumo yakho, ukuze kuthi loba ngumusa owenzayo ube ngowokuzithandela hatshi ukubanjwa ngamandla. 15 Mhlwawumbe isizatho sokwehlukaniswa lawe okwesikhatshana sasiyikuthi ube laye futhi kokuphela – 16 engaseyiso sigqili, kodwa esengcono kulesigqili, njengomzalwane othandekayo. Uyathandeka kimi, kodwa uthandeka kakhulu kuwe, njengomuntu lanjengomzalwane eNkosini.

17 Ngakho uma ungithatha njengohlanganyela lawe, mamukele ngendlela obuzangamukela ngayo.

18 Uma kulokubi akwenze kuwe kumbe elesikwelede kuwe, kubalele kimi.

19 Mina Phawuli, ngiloba lokhu ngesandla sami. Ngizahlawula – ngingabali ukuthi lawe ulomlandu kimi onguwe uqobo lwakho.

20 Ngiyafisa, mzalwane, ukuba ngithole usizo oluthile kuwe eNkosini; uvuselele inhliziyo yami kuKhristu. 21 Ngileqiniso ngokulalela kwakho, ngikulobela ngisazi ukuthi uzakwenza okudlula engikucelayo.

22 Okunye njalo yilokhu: Ngilungisela indlu yezihambi, ngoba ngithemba ukuba ngizabuyiselwa kuwe ngenxa yemikhuleko yakho.

23 U-Ephafrasi, oyisibotshwa kanye lami ngenxa kaKhristu uJesu, uyakubingelela.

24 Uyakubingelela loMakho, lo-Aristakhu, loDemasi kanye loLukha abayizisebenzi kanye lami.

25 Umusa weNkosi uJesu Khristu kawube lomoya wakho.